工聯會把握熱潮舉辦「陀螺王挑戰賽」(Threads圖片)
陀螺再次興起，工聯會把握熱潮舉辦「陀螺王挑戰賽」，歡迎街坊去現場感受熱血沸騰嘅爆旋陀螺競技，贏家仲可以獲得陀螺獎品喎！
贏家可獲陀螺獎品
今次賽事由工聯會立法會議員陳穎欣同區議員周潔莹舉辦，5月31號(星期日)喺石籬二邨地區辦事處舉行。街坊可以免費參與，不過名額得30人，報名先到先得。賽事分為「分組賽區」同埋「自由賽區」，前者會由大會提供比賽用嘅陀螺同發射器；後者就由選手自行攜帶陀螺同發射器。大會仲提供獎品吸引街坊參賽，自由賽區冠軍可以獲得陀螺獎品。至於分組賽區冠、亞、季軍都有獎品。
陳穎欣向《am730》表示辦事處一直有舉辦各種居民活動，例如羽毛球活動、電商訓練班等等。今次活動由周潔莹提出，係希望響應而家嘅陀螺熱潮，回應社區需要。陳穎欣分享細個都有玩，認同「搖搖」、陀螺等都係好多香港人嘅童年回憶。佢會密切留意今次比賽，如果受歡迎會喺其他區域舉辦類似賽事，與民同樂。
ADVERTISEMENT
