三代同糖｜吳兆麟露肉擔當晒腹肌震波周志康大熱天時變身鯊魚樓梯追逐身水身汗

無綫處境劇《愛‧回家之三代同糖》昨晚（8月31日）一集，劇情講述有「何媽」之稱的何文謙（周志康飾）對同事照顧周到，卻遭范特栖（吳兆麟飾）誤認為靠討好女同事上位，二人矛盾早種。及後，Suppose要WFH的文謙透過視像會議開會期間表現異常，遭發現原來假借WFH之名「鼠」了去和仔仔玩過山車！范特栖之後伺機告文謙一狀，二人關係更趨惡劣，由互藐演變為惡鬥，引爆連場笑料。

穿公仔衫上陣身水身汗

昨晚Alan吳兆麟雖然剝衫晒腹肌兼震波，但卻不及著公仔衫著到上頭頂的周志康搶焦！為了配合「瞓身賣橋」劇情，周志康大熱天時在沒有冷氣的後樓梯間，穿上「超重裝備鯊魚衫」與Alan大玩「後樓梯追逐戰」，更要冒著「寸步難移」之苦瘋狂「拾級而上」，最終跑樓梯跳出一身大汗及酸痛感：「呢場戲真係估你唔到成集最辛苦，因為拍嗰日真係好熱，我要著住嗰件衫配合唔同嘅角度係咁跑，真係身水身汗！加上件衫腳嘅位置因為真係好似鯊魚，所以我全程對腳都係被勒住，不過咁樣論論盡盡拍出嚟反而可能搞笑啲，所以都值得」、「好彩平時做開運動，飲多啖水就ok。」對於周志康的鯊魚造型，網民紛紛留言大讚可愛。

扮WFH偷坐過山車開會

另一場口，交代周志康坐住過山車開會一幕！見他一頭亂髮、開會開到「東歪西倒」，周志康最終意外曝露了去了坐過山車的事實，配以周志康詼諧十足的演繹，對此，周志康受訪時，大方透露相關場口是坐著瑜伽波、靠想像力扮坐過山車拍攝，並笑言拍畢後Core肌肉結實不少：「呢場戲係綠幕拍攝嘅，我都覺得呢場戲幾得意，如果大家有上開網，都會知個Source係嚟自邊度，我嗰時自己睇都覺得真係幾搞笑，所以拍起上嚟都覺得好玩！拍嗰吓我就係坐喺瑜伽波上面、自製個晃動感（高高低低、左轉右轉），除咗考驗想像力、最考驗就係個Core，加上唔單止拍一次，所以拍完之後我都係流晒大汗架！」更搞笑的是，為了令頭髮的狀態似足坐緊過山車，幕後同事現場有用風扇吹向周志康的頭髮，可惜最終卻因周志康髮型set得太行而要加大力度，執行監製Wilson（謝浩洋）受訪時笑言：「我好記得周志康個頭（髮）太硬，攞好多部風扇吹都吹唔亂。」