ViuTV今年嘅劇集屢有佳作，但我同時覺得埋藏一個好大嘅隱憂──就係創新力。
今年跑出嘅劇集都有共通點，全部係ViuTV頭幾年合作過嘅製作團隊。經歷過嘗試、失敗、再嘗試，有水準保證嘅團隊成功留低。《存酒人》同《IT狗2.0》都係來自簡君晋嘅團隊；《日落下的彩虹》係嚟自《反起跑線聯盟》嘅團隊；至於《COURT!》更加係香港金漆招牌之一嘅銀河映像，幾年前已經同ViuTV建立策略性合作關係。
ViuTV之前投資喺唔同嘗試、唔同團隊，今年換來收成期，搵到幾個可靠嘅外判團隊，係值得恭喜。但必須要有持續新團隊或新IP出現先可以延續落去。因為外判團隊可以轉去其他電視台或平台，又或者創造力會減弱，觀眾口味亦會隨時間而改變。
無論係《全民造星》、綜藝、MIRROR，以至以前嘅電視劇，ViuTV嘅成功一直靠「創新」。雖然會有較高嘅失敗率，但可以破局同換來篩選，得到一個較為健康嘅底氣。但若果開始成功就唔引入創新，好嘅團隊會流失。例如導演陳健朗，之前合作過《那年盛夏我們綻放如花》，佢依家就去咗Netflix拍嘢；又或者係之前《二月廿九》嘅羅嘉駿「刀導」，近年亦少有作品。當然流失係自然現象，但以前「一邊加、一邊揀、一邊補充、一邊嘗試」，先有部分團隊可以繼續做落去。如果呢個引擎、呢個新陳代謝冇繼續做，流失就會大過增加，亦係ViuTV劇集最大嘅隱憂。
網民成日批評大台食老本，近日搞AI背景又唔靚，但我覺得佢哋真係嘗試緊新嘢。或者幾年後會愈玩愈好。平台唔同電影公司，電視平台可以將項目做得更闊，保留部分項目當做投資未來嘅資本。大台喺二千年代就係缺乏創新，令之後嘅日子相當艱難，長時間沉醉老本帶嚟嘅成功，當知道要試已經太遲。
或者都係呢段歷史，依家試新嘢嘅反而係大台。「十年河東，十年河西」？還看今朝。
ADVERTISEMENT
