阿迪達的眼球

阿迪達大仔、現時係阿仙奴U18中場主力嘅加比爾(Gabriel)有虹膜異色症，對應父母各1隻眼睛顏色，天生異稟。呢位「細加比爾」可唔可以遺傳埋老豆嘅球技，打到上一隊難度唔細，尤其佢老豆係出名嘅嚴師，叫加比爾都冇情講。

阿仙奴冠軍成員有3個叫加比爾嘅巴西人，父子關係無法分割，但球員有合適嘅出路好心分手，達致雙贏係美事。「大加比爾」中堅馬加希斯，被譽為阿迪達任內最佳收購，球迷叫佢巴西之王，當然唔易放走；其餘兩位、捷西斯同馬天尼利，離隊成定局，其中馬天尼利好受廠迷歡迎，無奈進步不多，如今投沙特職將成為阿仙奴史上最貴放走球員，其實咁當打轉會費都係約5,500萬英鎊，打破9年前阿歷士張伯倫3,500萬鎊投利物浦舊紀錄。對比車路士同曼城依家瘋狂出入貨嘅金錢遊戲，阿仙奴都幾老餅；近年亦持續證明阿迪達捨得放走嘅人，通常再冇幾多剩餘價值，相反新簽嘅平貴都好都可以用到盡，靠成績令獎金同其他收入大增。用呢種視野氹老闆，都係阿迪達獨有。