劉偉恆執導的ViuTV熱播劇《日落下的彩虹》自開播以來，贏盡口碑，劇集結合老中青三代演員，唐詩詠、潘燦良、蘇文濤、許軼、周家怡、吳浣儀、張錦程、邱士縉(Stanley)等演出，備受讚賞。本周進入倒數階段，明晚(20日)將播放大結局，輪到郭鋒、夏雨及其子黃奕晨(Dixon)和陳欣妍登場，早前3位老戲骨夏雨、郭鋒和吳浣儀接受本報訪問，細訴拍劇點滴，久未拍劇的夏雨笑言，最懷念crew飯，「少咗燒臘飯係人生一大遺憾！」
淡出幕前已近7年的夏雨出山拍劇，並獻出兩個第一次，包括首次拍ViuTV劇集和首度父子檔上陣，他坦言，「其實我係好唔化嘅人，我要覺得套戲好啱做或者有發揮，難聽啲講句，適合我哋演嘅角色已經唔多，只有兩樣吸引我，角色同埋錢，Viu都唔會多錢！呢個劇本骨幹好，如果寫得唔好，搵影帝嚟都無用，愈做愈核突。」郭鋒和吳浣儀都好認同，「好有人情味，唔係嚟嚟去去你鬧我鬧你，爭家產。」雖然《日落》亦有爭產戲，但公屋分戶相對貼地。
至於父子檔合作，夏雨笑言多得Dixon帶挈，向導演推薦他，「我一秒入戲，拍完就抽走，唔記得佢係我個仔。雖然覺得好奇，但拍完又覺得無咩感覺，不過佢喺呢個圈都好多年，睇住佢進步，原來同初初個毛頭小子有分別。」在劇中演Dixon父親的郭鋒，一切看在眼裡，「其實佢哋父子好似！」夏雨聞言，「係咩？點解我唔知！」郭鋒秒回，「你梗係唔知，因為Dixon有同我傾偈，佢哋係你唔會話，我又唔會話你，大家互相尊重。」
郭鋒本身在彩虹邨長大，大讚劇本貼地有人情味，勾起昔日鄰里互助的溫情與親切感。劇中經營舊式文具店，雖沒有連鎖店美輪美奐，卻不知不覺成為街坊的聚腳點，吳浣儀謂，「例如我有唔開心，點會搵個男人嚟講，但真係會，可能係呢代冇咗嘅情懷。」夏雨劇中擔任彩虹邨街坊會主席，郭鋒同屬首批居民，談到最深刻場口，他憶述，「其實我同佢從小到大都恰佢，佢好內向經常唔出聲，其他人都話使唔使咁惡，但我恰慣咗唔覺，直至有一次，我突然中風無人知，佢送我去醫院，醫生問我食開咩藥，佢喺旁邊如數家珍，幾十年一齊，其實佢最了解我，只係唔駁嘴。」
郭鋒就爆夏雨感動到喊，夏雨亦直認，「係忍唔住，都估唔到，其實唔係我安排要喊，去到嗰個位好自然就喊。」郭鋒補充，「我要好無意地講，先令佢發現由細恰到大嘅老友，竟然留意佢日常嘅嘢，呢個就係人與人之間嘅感情。」問到今次可有爆金句，夏雨卻道，「你話《溏心風暴》好多金句，其實劇本寫咗啲好真實嘅對白，係我哋平日都會講，不過經過演員演繹，大家覺得佢演得好，加埋劇情同演得。」他望著吳浣儀笑指，「可能佢嗰句：『大家都一家人，做咩要搞成咁』就變成金句！」
說不出的親切感
再次投入拍劇節奏，夏雨自言絕無適應問題，「返到去拍劇，有一種講唔出嘅親切，「我個人好怪，我由第一日入行已經食叉燒飯、燒味飯，但係一啲都唔講得唔好食。呢幾年唔拍劇，我覺得少咗燒臘飯係人生一大遺憾，嗰種感覺好熟悉好親切，所以我都係要拍戲。」浣儀笑謂，「學發哥話，食叉燒飯有工開，日日食都唔拘。」
嘆老人無巿場
3位資深演員雖已年過七十，仍熱愛演戲，無奈面對被退休的現實，愈來愈窄，夏雨直言，「我梗係唔想退，咁大年紀，唔通搵你拍拖咩？同人講退休係因為無得撈啫。」郭鋒突然舉手反對，「我覺得係劇本問題，老人家都有老人家嘅戲。」不過他亦承認商業巿場以靚仔靚女為重，以長者為題材的電影不多，夏雨自嘲道，「夏雨主演，老到咁？唔睇喇！」
吳浣儀被封「吳婉轉」
雖仍有戲癮，但3人絕非有戲就「𦧲飯應」，夏雨率先表態：「如果話有個角色做一日戲，講幾句，我啋你都傻，我鍾意做戲，唔係搵你一日錢，呢啲角色都無預幾多錢，俾雙倍都無用啦，我唔化嘛！」郭鋒亦會先問清楚劇本和對手是誰，吳浣儀直言，「如果話唔使劇本，就咁坐喺度就得，咁使乜搵我坐喺度？個個都得啦！」她會以忙為理由推戲，夏雨笑言：「佢叫吳婉轉！」
自問少發脾氣
外圍因素無法控制，他們只能做好本份，保持身體健康應付拍攝，吳浣儀和夏雨異口同聲表示會游水，80歲的夏雨自言每個星期游水3至4次，以前更會健身。保持心境開朗亦重要，跟思想負面的朋友保持距離，免得經常聽人埋怨，沅儀笑問：「但好多人成日鬧人喎。」夏雨續說：「如果有個老人家成日鬧人，自己就要醒目，我唔鍾意長氣又唔鐘意鬧人。」那邊廂，坐在另一旁的郭鋒就連人帶凳慢慢移開，扮作避開，「佢又喺度發晦氣。」當夏雨發現時，亦不禁哈哈大笑，3位相當幽默。
郭鋒為亡妻收斂脾氣
郭鋒認真表示，以前性格亦很火爆，「以前太太(已故女星歐陽珮珊)，見我衝動想爆，就叫我去啦，咁我自己都會諗，一係就打交，打贏就坐監，打輸就入院，發咩脾氣，人生就係咁過，做好每件事就好了。」
ADVERTISEMENT
